ودلوقتي
حقيقي بجد صدقتِ ؟
بان سكوتي.. عمره ما كان
في يوم ساكت
وان الصبر
كان الجمر ف عروقي
لهيب قايد
ومستني
أنينك ينسمع مني
تعالي قبالي واجهيني
وخللي النني ف النني
نشوف انا وانتِ بعضينا
بقالنا زمان
ماشفتش نفسي ف عيونك
وانتِ كمان ما شفتينا
ياأم ولادها مش توأم
وبرضه اتلخبطت فينا
ظلمتِ.. وهو ده عيبك
وعيبنا.. إننا رضينا
ونرميكِ بسهام ظلمك
فنرمي صدورنا بإيدينا
تعالي ولملمي جرحك
فجرحك مننا فينا
وعن نفسي.. أنا مسامحك
وانتِ أكرم... فسامحينا
الى الأعلى
المصدر: الجزيرة مباشر مصر