احنا شعب .. وْ إنتو إيه؟!
ما تقولش شعبْ
"واللي هزَّ القلب منكو؟"
هوّ أنتوا ليكوا قلب؟
هوّ فيه قاتل لُو قلبْ؟!
ياللي إيدك قاطرة دمّي
وقافلة فُمّي..
وحارقة جثة صاحبي من غير أي ذنبْ
يبقى هوّ قلبه أسودْ
وانت صدرك مزرعة رحمة وحبْ؟!
بس عارف؟!
لينا رب الكون وليكم
من عماكم ألف ربْ
***
قلتو شايفين الطفولة وردة برية وبراءة
واحنا شايفينها سبايا
ياللي قاطفْ ألف وردة من عيال رابعةْ
بكف رصاص دناءة
ياللي حابس أبّهاتهم
وانت طالع بعد موتهمْ
مالي جيبك بالبراءةْ
يا للي كافر بالطفولةْ
وتتهمنا أننا شايفينها بعيون الفحولة
احنا ولا انتا اللي أجّرْ جسمها في فيلم (عدلْ)
احنا ولا انتا اللي عرَّاها عشان
تغري اللي جيبه زيّ خصية أي عِجْلْ
احنا واللا انتا اللي غنّى له اللي غنَّى
والبنات بالفيديو فرض عليه وسنّهْ
روحْ يا حيلةْ
في بلاد تانية ادعي فيها البطولة
بلاد ما تعرفش حقيقتكْ
قول قصيدتكْ
ألف رحمه وْنور على النفس الخجولةْ
لما ينفي الشاذّ -عَنْ رَاجِلْ- رجولةْ
****
(انتوا بتحبوا ابتسامة
واحنا بنحب الجهامة)
وتبتسم كيف الأرامل
واليتامى
بعد ما قتلتم أبوهم
ياللي بتزيدكم دمامة ..
الابتسامة
وانتو قاعدين في شاشاتكم تدبحونا وتدبحوهمْ
واحنا بتزيدنا وسامة.. الابتسامة
لما بنشوفها على وش الشهيدْ
تبقى حرية وكرامة
إنكو تعيشو فْ قصوركم
واحنا عايشين كالعبيدْ
أنكم يبقى لكو أنياب بالأصالة والنيابةْ
راشقة في لحم الغلابةْ
يا ديابةْ
تاكل الغزلانْ وتتهم الغزال اللي فضل أنه ابن غابةْ
...
كل عسلنا
وموّت النحلة اللي باقية بضفر دبْ
احنا شعب..
وإنتو إيه؟
ما تقولش شعبْ
***
مصر بالنسبة لكو ثومة...
ومصرْ بالنسبة لنا مصرْ
فيها دار بالني لينا
وفيها خيمة
وْفيها ليكوا ألف قصرْ
أنتو شايفنها فِي ريِّس كان في جيبه نكسه ليها
وفْ حليمْ
واحنا شايفينا في آية في صلاتنا نقرا بيها..
ودمعنا في سيله خوف منا عليها..
بعد
باسم اللهْ الرحيمْ
أما عن قولك "إمارة أو حريمْ"
فانت أدرى منّا بيهمْ
أنت عايش منّه فيهمْ
بالأمارة
احنا عايشين في بيوت بالنيّ
نصرف كام جنيهْ
وأنت عارف كام رصيدكْ في البنوك
وبْعملة ايهْ
...
قلتَ "راضي انت بقليلها"
يعني مليون ولا كامْ؟!
"واحنا سارقين منها نيلها"
يعني عاملين فرع منه يودّي غزة ...
ولّا كذبة والسلامْ
يا للي حافرْ جوّا قلبي نهر دمّ مودّي منه ألف فرع لعمّ سامْ
....
يا للي "ساقط منْكو شهدا"
كنت عايننهم ف جيب مخروم يا بعدا
ولا شايلنهم ف شنطةْ
وكيس بلاستيكْ
هوّ فيه قاتل بترجع له الرصاصة
ولا كان رابط رصاصه بطرف أستكْ
***
إنتو ثورة
ساقها ثُورْ
واحنا رَدّة عِيش عشان ياكله فقيرْ
يا طابورْ
واقفْ يبيع محصول حضارة وهوّ في غاية الحبورْ
والأرض بورْ
ما دمتُو آخر فلاحينها اللي
بْشطارة
بيرزعوا رصاص في الصدورْ
ويقولوا شعب وشعب... صعبْ
ليه أصدق كدبكم ..
والله صعبْ
طب إحنا شعب
وإنتو إيه؟!
ما تقولش شعبْ!!
***
أما عن إسلامنا..
فاقرا
قبل ما حبر الغباوة يندلق فوق الورقْ
لو صبح قلم اللي كاتب
ولا حنجرة المغني
كوز جهاله مملي أفلامْ الهفَقْ
يبقى ألف عوض على الله
ويبقى أولى
أنه يكتب اسم (تاجر)
قبل (شاعرْ)
أو (محني رجل سيده)
بدل (مغني)
ياللي بتحب الحياه
وتدعي ان احنا أهل أذى وفرقةْ
احنا بنحب الحياة والآخرة والبسمة اللي صدقه
وفينا رقة
تكفي أطفال البلد ديْ
ووحدي عندي
شعر فيه إسلام بيدّي
كل شحات في الطريق
لقمة من روحي مغمسها بودي
وطوق نجاهْ
للغريقْ
في بحر غلطاته الغريقْ
لو يكون عدو أو صديقْ
وانت ما ادتناشي في بحور اتهامك لينا طوقْ
قول لنفسك
يا للي كاتب..
يا للي غنّى
مين أحق بلومك...
احنا اللي المحبة والابتسامة فرض دِينّا
ولا إنتو
اللي اتهامكو لينا فرض شيطان وسنة
احنا شعب وإنتو إيه؟
ما تقولش شعبْ
بطلوا قلب الحقيقة..
دا تاريخ مكتوب بدمي اصحابي جد
مفهيوش لعبْ
***
"إنتو شايفين الحقيقة
والعقيدة في أي دين؟"
"دين أبوكم إسمه إيهْ"
رد
ـ يا حسينهم ـ
عليه!
الرسول اللي ذكرت اسمه يا شاعرْ
توبه - لو تعرف - قصيّرْ
يعني باسمه في قصيدتكْ جاي تتاجرْ
لاجل تشتمنا..
ومش عارف بأنك منّه يا تاجر بتسخرْ
...
ياللي ساقك حرفك الجاهل وراه
في بحر شعر مالكش في موجه سفينه
إنت بتقول أنت شايف ابن رشد مع الحسين
ولا ابن سينا
واحنا شايفين ابن لادن
ماهو إما انت
يا تعميتْ
يا احنا ياخي إللي إتعمينا
هو لو كان ابن رشد أو الحسين أو إبن سينا
في قلوبكم
كنتم شلتم بندقية؟
كنتُ خطّيت القصيدة بدمّ صاحبي وقلتِ إرهابي
ومين قاتله ضحيه
كنتَ عبيت السجون مْهندسين مْدرسينْ
أو أطبا
وعلما من كل لونْ
شرع مين
أي دينْ
يا اخي كنت اقرا ولو سطرين ف فلسفة الحسينْ
لو بَقِي لك جوّا قلبك نص عينْ
ربع عينْ
لاجل تعرف إيه –ياخي- بيودي فينْ
***
غير كدا
تاجر على راحتك
وبيع مليون قصيدة
وانت هتلاقي في بختكْ
ألف مليون مشتري شايفها صيدةْ
ادّ واقبض منه دمّ اصحابي تاني
وابتسم
برضه هافضل سلمي زي الدين ما قالْ
سكينتي ماهْياش غير قلمْ
بالأمل هاكتب به موتَكْ يا عدمْ
رغم أن التاجر اللي بايع الشهدا بسوق شعره الرخيص رخص التهمْ
مش هلاقي فْ عرقه دمْ.
رابط على يوتيوب:
https://www.youtube.com/watch?v=8YTe_IM-ecw
