ماذا يا هذا
خلا فرحنا قلب بجنازة
الجمعه الأولى اتعشمنا
والجمعه التانيه اتكلمنا
والجمعه التالته اتكممنا
فرجع يوم الجمعه أجازه
ماذا ياهذا
ألفين بيه بيقولوآراءهم
وبيتعالوا على اللي طَلَقْهُمْ
حبة ريح تعرف أخلاقهم
وتشم الريحه النفاذه
ماذا ياهذا
يوم ماهتنطق تاخد طلقه
سكتم بكتم وبلاش فلقه
واما تشاور تاكل علقه
تلقى ف وشك ميت غمازه
ماذا ياهذا
تاخد صوتي وتملك أمري
وتبيع روحي وتمسح عمري
هودا آخر صبري وحظي
ولا أنا ماسخ وماليش عازه
ماذا ياهذا
اللي باعونا امتلكوا الثروه
واللي اشتروا بيجزوا الفروه
إحنا مابينهم بيعه وشروه
والسمسار كان ع الفرازه
ماذا ياهذا
هذا بيان للناس الفقرا
ماذا لو استدعيتوا القمره
أنا يوميا بزرع شجره
ومعنديش أرض ولا حيازه
ماذا ياهذا
ماذا ياهذا
خلا فرحنا قلب بجنازه
• شاعر وباحث في التراث
عضو اتحاد كتاب مصر
حاصل على جائزة الدولة التشجيعية سنة 2004
رئيس جمعية أدباء وفناني بورسعيد
